சமூக வலைதளங்களில் காதல் தேடி வந்த மூன்று இளைஞர்களை ஹனி டிராப் மூலம் வசப்படுத்தி, மயக்க மருந்து கலந்த டீ கொடுத்து தங்க நகைகள், செல்போன் உள்ளிட்ட பொருட்களை பறித்த மூன்று பெண்கள் திருச்சி போலீசாரால் கைது செய்யப்பட்டுள்ளனர். இந்த சம்பவம் திருச்சி சமயபுரம் அருகே உள்ள ஒரு தனியார் ஹோட்டலில் நடைபெற்றது.
சம்பவம் குறித்த விவரங்கள் வருமாறு: திருச்சியைச் சேர்ந்த மூன்று இளைஞர்கள் (வயது 20-25) நீண்ட நாட்களாக திருமணம் செய்து கொள்ளும் எண்ணத்துடன் இன்ஸ்டாகிராம் மற்றும் ஃபேஸ்புக்கில் பெண்களிடம் நட்பு ஏற்படுத்தி வருகின்றனர்.
அவர்களுக்கு ஒரு பெண்ணின் ஐடியிலிருந்து நட்பு ரீதியான செய்திகள் வந்தன. பின்னர் அது காதல் உரையாடலாக மாறியது. நீண்ட நாட்கள் போனில் பேசிய பிறகு, இருவரும் நேரில் சந்தித்து உறவை மேம்படுத்தினர்.
மூன்று இளைஞர்களும் மூன்று பெண்களும் சந்திக்க ஒருங்கிணைந்த இடம் சமயபுரம் மாரியம்மன் கோவில். “கோவிலுக்கு வந்தால் யாருக்கும் சந்தேகம் வராது, சாமி தரிசனம் செய்து காதலையும் வளர்த்துக் கொள்ளலாம்” என பெண்கள் தரப்பில் பரிந்துரைக்கப்பட்டதாகக் கூறப்படுகிறது.
இதன்படி, இளைஞர்கள் டிப்-டாப் உடையில் வந்து சமயபுரம் அருகே உள்ள ஒரு தனியார் ஹோட்டலில் அறை ஒன்றை பதிவு செய்தனர்.
அறைக்குள் நுழைந்ததும் பெரும் அதிர்ச்சி காத்திருந்தது. சாட்டில் பேசிய இளம் பெண்கள் என்று எதிர்பார்த்த இடத்தில் 30 முதல் 47 வயது வரையிலான மூன்று பெண்கள் இருந்தனர். அதிர்ச்சியடைந்த இளைஞர்களை அந்தப் பெண்கள் சமாதானப்படுத்தினர்.
“நாங்கள் சிங்கிள் தான், இந்த காலத்துல வயசா பிரச்சனை, கண்டிப்பாக உங்களை கல்யாணம் செய்து கொள்வோம்” எனக் கூறி நம்ப வைத்தனர். வயது வித்தியாசம் பற்றி பேசியபோது, “காதலுக்கு வயசுக்கு தடை இல்லை கண்ணா?” என மேற்கோள் காட்டி இளைஞர்களை மயக்கினர். அன்றிரவு திருமணம் செய்து கொள்ளலாம் என முடிவு செய்து அனைவரும் அறையில் தங்கினர்.
பெண்கள் மூவரும் இளைஞர்களுக்கு டீ கொடுத்தனர். அதில் மயக்க மருந்து கலந்திருந்தது. டீ அருந்திய இளைஞர்கள் தூங்கிப் போனார்கள். மறுநாள் காலையில் எழுந்து பார்த்தபோது அதிர்ச்சி காத்திருந்தது.
அவர்களது கழுத்தில் அணிந்திருந்த தங்க செயின்கள், கை வளையல்கள், பாக்கெட்டில் இருந்த செல்போன்கள் உள்ளிட்ட மொத்தம் 7 சவரன் தங்க நகைகள் மற்றும் பணம் அனைத்தும் காணாமல் போயிருந்தன. மூன்று பெண்களும் தப்பி ஓடிவிட்டனர்.
போலீசாருக்கு புகார் அளிக்கப்பட்டதை தொடர்ந்து விசாரணை நடத்தினர். இதில், மதுரையைச் சேர்ந்த முத்துலட்சுமி (47), மதுரையைச் சேர்ந்த சந்திரா (39), சிவகாசியைச் சேர்ந்த சுந்தரி தேவி (30) ஆகிய மூவரும் அடையாளம் காணப்பட்டு கைது செய்யப்பட்டனர். அவர்களிடம் நடத்திய விசாரணையில் பல அதிர்ச்சியூட்டும் தகவல்கள் வெளியாகியுள்ளன.
இந்த மூன்று பெண்களும் தமிழ்நாடு மட்டுமின்றி கேரளா, ஆந்திரா, கர்நாடகா உள்ளிட்ட தென் மாநிலங்களிலும் இதே முறையில் செயல்படுவதாக போலீசார் தெரிவித்தனர்.
இளம் வாலிபர்களை இன்ஸ்டாகிராம், பேஸ்புக் மூலம் காதல் என்ற பெயரில் ஈர்த்து, கோவில் அல்லது ஹோட்டல்களை அழைத்துச் சென்று மயக்க மருந்து கொடுத்து கொள்ளையடிப்பது இவர்களின் வாடிக்கை முறையாக உள்ளது.
மேலும் தகவல் திரட்டி வருகின்றனர். இந்த சம்பவம் இளைஞர்கள் மத்தியில் பெரும் பரபரப்பை ஏற்படுத்தியுள்ளது.
எச்சரிக்கை : இளைஞர்களே, சமூக வலைதளங்களில் அறிமுகமில்லாதவர்களுடன் விரைவில் நம்பிக்கை வைத்து நேரில் சந்திப்பதைத் தவிர்க்கவும்.
ஆன்லைன் காதல் என்ற பெயரில் வரும் பல ஹனி டிராப் கும்பல்கள் வருகின்றன. உங்கள் உயிருக்கும் உடைமைகளுக்கும் ஆபத்து. சந்தேகம் இருந்தால் உடனடியாக போலீசாருக்கு தகவல் கொடுங்கள்.
Tags:
Crime